2014年6月16日 星期一

騎虎難下

細閱以下文章,然後回答閱讀理解題:
1 本文主旨是甚麼?(2分)
2 員工小圈子會造成甚麼問題呢?(1.5分)
3 本文用了甚麼寫作手法/修辭手法?(1分)
4 如果你是公司大老闆,你會如何處理地方分店問題?(2分)
5 假設你是分店職員,你會演飾分店當中哪個角色呢?為什麼?(2分)
6 一間成功公司,需要具備甚麼條件呢?(1.5分)

9-10分 你真係好叻
7-8分 你係好叻
5-6分 你好叻
3-4分 你叻
1-2分 叻
0分 你真係口與力

----------------------------------------
<< 騎虎難下>>

有一間上市公司,分店數百,業務多元化,旁人見佢生意蒸蒸日上,以為無咩野啦,都係做生意姐,但點知原來公司內部管理嚴重不濟,有啲地方分店更有倒閉危機。

所謂人夾人緣,大老闆衰都唔算最緊要,最緊要係糧期準,這是常識吧,最緊要有錢生活嘛。但唔知乜事,有間地方分店同事之間喜歡製造小圈子,仲唔止一個,呢個問題引起總部關注。

咁呢間公司總部就覺得,以前佢地業務排第一,但而家其他分店都唔錯,雞肋嘅野,食之無味,棄之可惜,最後決定睇下情況先算啦。

忽然有一日,公司地方分店開大會,入面高層因為知道地方經理廢,令分店業務不及往日,請埋啲員工更加良莠不齊,所以夾計迫走經理,啲高層員工仲拉攏剛入職嘅年青員工一齊施壓。但呢位經理深得總部喜愛,對呢啲問題一於少理。

嗱,點知問題出現喇,好多資深員工人心惶惶,佢地無非都係想有安穩生活,俾佢地安老退休就好; 而有啲IT等專業部門就無咩所謂啦,東家唔打打西家姐; 至於剛入職嘅同事,雄心壯志,誓與高層一齊夾計迫走經理,引起總部關注; 而一部分極具野心嘅分店小職員,因為有啲外勞員工好食懶飛,所以處處針鋒相對。呢間地方分店從此就變得四分五裂喇。

總部的確注意到問題,所以特別發出通告指引,告訴呢間地方分店職員知,總部無放棄呢間地方分店,但都期望員工乖乖地安守本份。

點知通告一出,地方分店員工覺得總部無誠意,擺明玩野,所以有高層決定圍內開多次大會,睇下應該邊個做經理先能夠挽回大局。

總部都無可奈何,一副愛理不理嘅態度,決定睇下呢班地方員工做到啲咩出黎,額頭仲貼住"你夠膽踩上黎總部抗議先算" 。而地方分店員工上下各有己見,有啲話勢在必行,有啲話多一事不如少一事,有啲粗暴話你唔鐘意咪跳槽囉,有啲決定吃花生,有啲就趁情況未去到最壞就拎公司著數。內部分裂,已變得無可救藥。

然後,有少部分地方員工職員醒覺,呢啲內部大會做左咁多次,點解唔直接踩上總部去抗議?喺自己分店抗議總公司嘅冷漠無情,有用嗎?呢間地方分店還能夠上下一心做番昔日嘅最好業務分店嗎?而呢部分職員知道呢間分店職員各懷鬼胎,最後如果衰也是衰在自己手上。結果,呢部分職員,還是乖乖地做自己野,變成另一個圈子。

一間成功嘅公司,無論總公司又好,小分店也好,應該要令員工有歸屬感,上下一心,先能夠打造美好嘅工作環境,令公司向前進,否則問題只會越積越深,走向黑暗,一潭死水,等待乾涸。